சிறகிரண்டு எனக்கிருந்தால்!!

விண்ணளக்கும் பட்சிகள் கொண்ட வரந்தான்
என்ன! இருள்தழுவும் இவ் வறண்ட பூமியிலிருந்து
தொலைவாய் கண்ணூடு புவிக்கோளத்தினை
அளந்தவாறு விண் மிதக்கும் அவை விண்ணாளுந்
தெய்வங்களெனலாம்.
மண்கொண்ட கர்மமனைத்தும் விண் சேர்ந்தால்
விலகுமென்பர் யார் கண்டார் விண் உலாவும்
புள்ளினங்களதும் கர்மமனைத்தும் விலகியதாலோ
என்னவோ மண்ணுளர் மனதைத்தாண்டி
விண்ணளவும் உயர்ந்துளனர்.
என் மனங்கொண்ட மாயை துறந்து நானும்
விண்ணழைய விழைகிறேன் இப்புவியதனின்
அழகுதனை ஓர் பார்வையிற் காண யார் தான்
மறுதலிப்பார் எனினும் அதுவுமோர் மாயைதானே!
சில சமயம் என் மனத்து சிறகிறண்டு கொண்டு
விண்ணெழுந்து விலகிச்செல்லத் தோன்றும்
பரந்துவிரிந்த இப்புரவியிற் சிலவற்றிலிருந்து!
மனிதமில்லா மனிதர் காண்கையில் நானும்
அவர்களிலொருவனா என எண்ணியே
என் தூக்கம் தொலைத்த நாட்கள்
கணக்கிலில்லை.
அனைவர் செயலிலும் பிழைகாணும்
மாந்தரிடமும் தன்னலச்சாதல் கொண்டோர்
நினைவிலிருந்தும் உளமும் புறமும் வேறு
கொண்டோர் பேச்சிலிருந்தும் பிறர்
மனமறியா வசை தொடுக்கும்
சபையினரிடமிருந்தும் விலகல்
வேண்டுகிறேன்.
சிறகிரண்டு எனக்கிருந்தால் விண்
கொண்டெழுந்து சூரிய ஒளிதனில் பிரகாசிக்கும்
பூவெளிகளையும் பனித்துளி பளபளக்கும்
புல்வெளிகளையும் காணச்சென்றிருப்பேன்.
நிலவொளியில் நீர் சூழ்ந்த மண்பரப்புகளை
கண்ணயரும் வரையில் பார்த்திருப்பேன்.
ஆயிரமாயிரம் தருக்கள் நிறைந்த பச்சைக்
காடுகளின் உச்சிக்கிளைகளிலிருந்து
உயிர்க்காற்றை சுவாசித்திருப்பேன்.
விண்ணிலிருந்து மண்ணடையும்
மழைப்பளிங்குகளை விண் மிதந்தபடியே
இரசித்திருப்பேன்.
மலைவழி தவழ்ந்து மண்ணிலேயே பாயும்
நீருற்றுக்கருகில் என் உடல் சுருங்கும்
வரையில் உயிரழிய விழி விரித்திருப்பேன்
முன்னோர் ஊழியில் நான் செய்த
கர்மங்களின் விழைவுதானோ மனிதம்
அழியும் மனிதருள் பிறப்புக் கொண்டேன்
அடுத்ததோர் பிறவியிலாவது விண்ணரசர்
படையில் எனக்கோர் இடங்கிடைக்காதா
என எண்ணியவாறு மீண்டும் என்
மனவழியிலான சிறகுகளை
தொட்டுப்பார்க்கின்றேன் தானாய்
மெய்சிலிற்கின்றன.

#அழகியதொருவாழ்வு ❤️